John 13

Yesu Wa Zhan Wo Abara Apita

1Nwyesheyi ai gna a ɓei zhin Paska nsu, Yesu wa ku kpe ge owo sukwo pmaknayi nu, wa kpe jeze lo wo Dada aba nshe. Wa ku ye-ye wu ɓa nɓa zhin owo anya nnanyi, nsahi wa wu ɓa owo ye-ye dei-dei. 2Bai kpe n tebur ɓai gyi wyeshe-nyagyi, shetan woi la lo dna n Yahuda-Iskariyoti Siman nugun bugba, ntu ge wa kun Yesu. 3Yesu ɓo ku kpe ge, Dada ku anya vinya fa fi nwo akun, njesun shi wa gmi Shekwoyi aba nu nyi, wo ɓa je ze lo Shekwoyi aba n njesun. 4Esa nu ɓa ɓo kpe ɓai gyi nyagyi, Yesu wa laka wa kma aje zhi, wa ku tawal wa pa nshin. 5Wa la nuwan wa sin fi n kwanu, wa zhan wo abara apita, wa wun ɓa apita ya n tawal yi nwo ɓo cei pa nyi.

6Shi wo ɓo si Bitrus aba, Bitrus wa nya wo ge, “Dagayi ho nu ye ha zhan mi apita?”

7Yesu wa gna wo ge, “Ho ta kpe ɓe ye lo nmi zhin nyin, ama ho ɓo kpe ye nwyihoi.”

8Bitrus wa gna, “To omi apita nu nho ɓa zhan.” Yesu wa gna wo ge, Nmi to zhan ho apitam, agye ho to zhin mi bara num.

9Bitrus wa gna Yesu ge, Omi apita nu to kawai n ho ɓa zhan ama zhan mi abwa ɓedo nmi tukwoyi.

10Yesu wa gna wo ge, “Oza nwo la nuwan fu, aɓa bwa wo apita nu zhan, owo nayi gyi-gyi-yi lo. Fye gyi-gyi-yi lo, ama ofye vinya nu tom.” 11Wo ɓo da lo nu ntuge, wo kpe oza ye lo nwo ɓa kun wo, ce nu ɓo zhin wa ci ge, ʼofye vinya nu to gyi-gyi-yi lo m.

12Esa nu wo ɓei la apita zo ɓa zhan, wa ku je kpe, Wa sase, Wa nya ɓa ge, “fye kpe ɓo ye lo nma zhin fye nyi?” 13“Fye yi mi ge malami, njesun ge Dagayi, gaiciya nu, ntu ge mi zhin kwo nu.” 14Shi emi nmi zhin Dagayi n Malami yi mi la apita zhan fye nyi, fyehin fye zhan aje apita. 15Mi la of ye manayi ya shi fye, fye zhin lo nu ngye shi ma zhin fye nyi. 16Ɓehin-hin ma gna fye, fyenu ta du puwadam, tnu-tnuyi ta du oza nwo tnu wo tnu-tnu nyim. 17Shi fye ku kpe lo nu nyi, fye ɓa bwa anabarka ndei fya zhin lo nu.

18“Mi ta da ɓe ye nfyei vinya num; Mi kpe aza ye lo nmi la kni. Littafi ku da ge, ‘Zaho lo woi gyi nyagyi nkunsun nmi yi, Wo nu ɓa kun mi.’ 19Mi pma fye gna nu, n nabai shi kwo zhin, fye ga mi gaiciya ge mi nu zhin Kristi. 20Behin-hin ma gna fye, oza nwa gwo mi tnu-tnuyi, wo la mi gwo, oza nwa gwo mi, wo la Shekwoyi gwo nwa tnu mi nyi.”

Zaknayi Nfye Mi Ɓa She Mi

21Shi Yesu ɓo ku dalo nu, bugba wun wo, wa gna ɓa ge, “Ma gna fye gaiciya, oza ho lo nfye mi nwo ɓa kun mi” 22Owo abara ɓa shi aje awye, to ɓa kpe oza ye nwo da wo ɓo m. 23Bara-ho ɓo sase tu vi-vi n Yesu yi, Yesu ɓo zhin woi ye wo nmwa. 24Siman Bitrus wa yi barahi ge, “nya Yesu oza nwo da wo ɓo.”

25Wa lo vi-vi n Yesu yi, wa nya wo ge, “Dagayi nyikado nu-a?”

26Yesu wa gna ge, “Owo nu zhin oza nmi ɓa ga wo ezhegma, mi-i la kwo dna nna anyi.” Wa da dna wa ga Yahuda Iskariyoti Siman nugun.

27Shi Yahuda ɓo gwo buredi, shetan wa lo dna nwo bugba. Yesu wa ci wo ge, “Bo ho ye ha zhin, zhin kwo npye.”

28Ozaho-zahoi nwo ɓo tu nna nyagyi ba to ɓo kpe ɓeye n Yesu dam. 29Shi Yahuda nu ɓo zhin oɓa gyiwyeshiyi nyi, azaho ɓa gye ge Yesu ɓo tnu wo nyagyi si nu, ko ge wo ga awyekwoi gyiwye. 30Yahuda wa pye ngmiya loi, dna nsukwo wyegmahi.

31Esa nu Yahuda ɓo zo gmiya, Yesu wa gna ge, “Esa la si a la Oza Nugun tu, aga Shekwoyi mwa-mwa njesun. 32Ndei ala Shekwoyi latu dna nwo, (Yesu) Shekwoyi nwohin ɓa la Nugun tu, Woi ɓa zhin ce lo nu safyewyi. 33Omi aɓi nawyi, esa fyewyi nɓa fa fye, fye ɓo zan mi shin, mi gna fye nu ngye shi mi ku gna a Yahudiyi nyi, aba nmi lo nyi fye ta mi fya ɓe m.

34“Wyidna woi-woi nu nmi ga fye, fye ye najeyi, shi mihin ma ye nfyei nyi, Nlo nu fye ye najeyi. 35Nfye ye aje lo, zaho-zahoi ɓa kpe ge fye zhin omi abara nu.”

36Siman Bitrus wa nya ge, “Dagayi ho lo nna?” Yesu wa gna wo ge, “Aba nmi lo nyi ho ta mi ha gni lo nmi yi m, ama ho ɓo ɓe da mi n sahoi.”

37Bitrus wa je nya ge, “Dagayi knihi nu ɓa zhin to ma gni lo nhoi nsayi yem ma?” Gama mi la ye ma fi ntu ho ɓo.

38Yesu wa nya wo ge, “Ha fi ntu mi ɓo? Ma gna ho gaiciya, ho ɓa na mi ye kpe ɓo har abwa ngun ata, pise-nugba kwa kpe ku ce.”